Propaganda inperiala: irudiaren indarra Erroman

Erromatar printze edo enperadoreek erabateko nagusitasuna zuten gobernatzeko garaian, haien esanetara zeuzkaten gudarosteen nagusitasunari esker. Matxinadak piztu orduko zapaltzen ziren, zakar eta azkar. Zeukaten administrazioa ere eraginkorra zen, Inperioko bazter guztietara heltzen zen, eta probintzietako aberastasunak drainatzeko aukera ematen zuen. Horretaz gain, ondo baino hobeto diseinatutako propaganda-politikaz baliatzen ziren, irudi eta estetika jakin batzuetan adierazten zena. Ikastaroan alderdi hori jorratuko da batez ere, boterea irudikatzeko eskulturan, arkitekturan eta hirigintzan zein eredu ikonografiko erabiltzen zen aurkeztuz. Gure ustez gaurkotasun handiko gaia da, irudiaren ahalmena –edozein dela ere tokia eta garaia– kontuan hartu delako gobernu-baliabide bezala. Eta alde horretatik, berriz ere, maisutzat har dezakegu Erroma gure garaian.